訊通搞墓園 請楊天命做顧問

【明報專訊】自內地殯儀股中國生命集團（8296）舊年9月上市之後，港股興起一個新炒作概念，就係「發死人財」概念。之後多間上市公司都話要搞墓地、骨灰龕場之類嘅業務。籌辦一站式展覽業務嘅訊通控股（8082），日前亦宣布進軍蘇州墓園業務，佢哋仲好有諗頭，將會請本港堪輿界名人楊天命作顧問。

楊：有聯絡過 未見聘書

噚日，有市場有消息話，訊通為咗更好咁發展墓園業務，將聘請知名風水師楊天命作為其風水顧問。小琴好奇之下，噚日打電話畀楊天命求證一吓，楊生果時身在台灣。楊天命話，關於發展墓園業務，訊通確實有聯絡過佢，並且話呢兩日訊通會發一啲關於聘用嘅文件畀佢睇睇。不過，截至噚日，楊生仲未見到相關文件。楊生話，今日佢返港後或會見到詳細文件。小琴亦向訊通查詢一吓，公司話，無法即日給予回覆。

本周一，訊通就有關潛在收購墓園業務發出公告指出，於2010年8月11日，訂立諒解備忘錄，會收購一間公司嘅50％股權，呢間公司持有經營墓園嘅蘇州名流陵園實業公司75%股權。不過，市場對消息反應一般，公司股價噚日逆市下跌6%至0.234元。