巴菲特拍賣簽名巨羹

【明報專訊】股神巴菲特樂善好施，每年都會捐出自己嘅午餐時間做拍賣，為慈善機構籌款。今次，佢又有籌款新橋，就係捐出一支由佢親筆簽名嘅巨型匙羹，並放上網站ebay公開拍賣，噚晚小琴執筆時叫價已升到2850美元，約等於2.2萬港元，拍賣將於美國時間7月30日截止。今次拍賣嘅匙羹，係由巴菲特投資旗艦巴郡旗下一間雪糕公司「冰雪皇后（Dairy Queen）捐出，呢支匙羹係用來食雪糕。不過，今次所拍賣嘅並非普通嘅匙羹，而係一支長33吋、重5磅嘅超巨型紅色匙羹。巴菲特已喺上面親筆簽名。暫時叫價2.2萬 本月30日截止家，支匙羹已擺咗上ebay拍賣，小琴噚晚望一望，已經有47口叫價，最新叫價2850美元，每口價50美元。將於當地時間7月30日晚上7點截止，講明「貨物出門恕不退換」。今次善款將捐畀一間兒童醫院，有興趣可上http://www.ebay.com望望。上月午餐會 賣到2000萬巴菲特上個月啱啱完成咗佢第11次嘅慈善午餐拍賣，成交價為263萬美元，即約2051萬港元，金額創咗歷史新高。投得午餐會嘅人身分至今未明。巴菲特上月中發表聲明話，佢與微軟主席蓋茲夫婦倡議，全美國嘅億萬富翁齊齊宣誓，在有生之年或者死後，將自己一半家產捐畀慈善機構，並打算向全世界推廣佢哋嘅「慈善誓言」。報料電郵﹕piano@mingpao.com