日名牌店殺入上水 最貴手袋賣88.8萬

【明報專訊】喺銅鑼灣、中環、尖沙嘴等核心購物區，Gucci、 LV、Hermes、Chanel、Dior等名牌店舖，隨處可見。之但係，喺人均收入較低嘅上水，後日竟然有一間貨品售價動輒數以萬元計嘅名店開張，而且其中一個手袋更賣到88.8萬元。 小琴講緊嘅係總部設於日本東京二手名牌專門店Brand Off，後日將於新界北上水中心開設香港第4間分店，舖面超過1000平方呎。開張當日，佢哋會展出一個來自總店、但產自法國嘅Hermes Birkin二手限量版白金兼鑽石扣鱷魚皮手袋，同時可接受買家認購，叫價88.8萬元。 安排今次活動嘅有關人士話，咁貴嘅手袋擺喺鄰近較多基層嘅上水廣場展示，其中除咗搞噱頭之外，仲希望吸引剛由羅湖口岸過關到該商場購物嘅內地大豪客「落疊」。小琴覺得有啲奇怪，如果內地豪客買名牌，通常會行銅鑼灣、尖沙嘴，到上水買嘢，多數係買奶粉、海味、藥品，究竟會有幾多人去上水買名牌手袋，真係是睇過先知。