TCI前亞洲區阿頭 搞基金不再激進

【明報專訊】曾經代表有「壞孩子」之稱嘅對冲基金TCI、進入領匯（0823）做董事嘅何志安，09年7月離開TCI後，另起爐灶搞基金。何志安旗下嘅對冲基金Janchor Partners Pan Asian Fund ，最近成功籌集到一筆總共1億美元嘅新錢，準備投資股票市場。何志安話，佢旗下基金，唔會採用TCI嗰種投資手法。 TCI最為人所熟悉係佢哋激進嘅投資手法，例如曾經行使投票權，推翻德國證券交易所收購倫敦交易所嘅建議，並將德交所行政總裁拉下台。何志安接受《彭博》訪問時話，家佢成立嘅基金，有四位同事係TCI嘅舊同事。對於舊年突然間離開TCI，何志安就唔肯講係乜嘢原因，因為佢同TCI有簽協議，所以唔講得。佢離開TCI前，係TCI嘅亞洲區主管。 自家基金 稱回報跑贏大市 佢旗下基金所籌集嘅基金，90％都係長線資金，三年以上先可以贖回。何志安聲稱，佢管理嘅基金今年上半年扣除管理費後嘅回報率有9.9％，跑贏大市。