中銀人壽教小學生做生意

【明報專訊】中銀集團人壽保險有限公司執行總裁蔡中虎開班授徒，呢班小徒弟都係小學三年級學生。佢哋參加國際成就計劃香港部嘅活動，噚日去咗中銀集團人壽參觀，蔡總仲親自教佢哋做生意。 蔡總裁問佢哋大個想做咩工作，班小學生一啲都唔怯場，好積極舉手咁話想做歌手、醫生、警察、開鑽石店。 活動後記者訪問咗幾個學生，問佢哋參加今次活動有咩感受，有一個學生話「CEO間房好大，大個都要做CEO」。有學生就話「諗吓點樣令老細欣賞自己」，真係人細鬼大。在旁嘅蔡中虎都話班小朋友好聰明，加以栽培的話，日後一定係叻仔叻女。 中銀人壽今年首季嘅新做保單業務，全行排第一，擊敗「一哥」匯豐人壽。蔡中虎就話仲未滿意，希望中銀人壽嘅業務可以持續擴展，仲話等金管局同人民銀行嘅清算協議一拍板，就會推出更多人民幣保單業務搶客。