聯想扭虧 CEO立即加薪

【明報專訊】聯想（0992）截至今年3月底嘅年度內，全年純利雖然略低於預期，但總算成功扭虧。公司業績改善，管理層亦獲得加薪，當中行政總裁（CEO）楊元慶嘅年薪為732萬美元，即5710萬港元，加薪1.2％，薪酬喺本港上市中國企業來講，算係打工皇帝一族。 至於舊年喺危機之中出山，出任主席嘅聯想創辦人柳傳志，年薪更大躍進，收228萬美元（1778萬港元），按年大升2.5倍。不過，當中大部分係購股權等「長期激勵」，呢批報酬總值183萬美元。 加薪1.2％ 可見已獲肯定 楊元慶獲得加人工，雖然只係1.2％，但對楊元慶嘅意義重大。事關今次係聯想舊年作出高層大變動、楊元慶重新做CEO之後嘅第一份成績表。公司成功扭虧，楊元慶得以加薪，證明其表現得到董事局肯定，CEO個位可以坐得穩。 事實上，楊元慶CEO個位得來不易。自從2005年聯想以12.5億美元鯨吞國際商業機器（IBM）個人電腦業務之後，公司業績表現一直欠佳，當時身為主席嘅楊元慶成為眾矢之的，2009年更加一度傳出，楊元慶會被迫離職，之後柳傳志仍力撐楊元慶，畀佢重新做CEO。 副總裁：樂Phone斷貨 不過，未來決定楊元慶前途嘅，應該係公司旗下嘅智能手機「樂Phone」。「樂Phone」以蘋果iPhone為假想敵，聯想嘅目標係今年賣出100萬部，楊元慶早前曾揚言﹕「樂Phone賣不過iPhone就是失敗！」換言之，如果「樂Phone」賣唔到100萬部，楊元慶個位可能就有危機。不過，目前睇來，「樂Phone」銷售應該問題不大，路透社日前引述聯想副總裁童夫話﹕「（樂Phone）都快賣瘋了，現在斷貨」，表示非常有信心達到銷售目標。 報料電郵﹕piano@mingpao.com