珍藏留子女比率 全球尾三

【明報專訊】小琴成日聽人講一句話︰「如果我係某某富豪個仔女就好喇﹗」皆因大家都有個習以為常的觀念，覺得做咗富二代，可以唔做嘢，成日遊山玩水。到手頭緊時，開口問問阿爸自然有「水」到。但原來現時的富豪觀念不同以往，佢地儲起名貴資產，都未必會畀晒下一代。


港富豪全球排名尾三

最近巴克萊做咗個報告，訪問咗全球各地2000個富豪，想知佢地收藏名貴資產的喜好種類、原因同埋會唔會傳畀下一代。報告發現，受訪的100個香港富豪只會將四分之一的名貴珍藏品留畀下一代，比率低到排全球尾三﹗而睇番排全球第5的中國，比率都有過五成，而排第一的印度就接近七成﹗真係難以置信﹗不過巴克萊亞太區財富顧問主管關天敏就解釋，好多富人就算留低珠寶首飾畀仔女，年輕人同家長口味不同，未必會喜歡，可能最後賣咗佢套現就算，所以先決定唔傳畀仔女，而選擇捐畀博物館、大學等做展覽用途。另一方面，可能香港家長又覺得買樓畀仔女更實際，所以寧願送樓都唔送家傳之寶。