金沙新場開幕 強攻中場

【明報專訊】金沙中國（1928）喺澳門路氹個新場金沙城中心周三開張，公司做法相對銀河娛樂（0027）舊年新場開幕低調，但都有請一大班分析員過大海參觀吓。小琴老友就話，新酒店Conrad好住過同系嘅威尼斯人酒店，原因竟然係個新場冇威尼斯人，唔會下下行到腳仔軟喎！


分析員朋友仔又話，據佢肉眼觀察，金沙城中心個賭場好旺吓，夜晚11點幾個中場都爆滿。做生意嘅嘢，首日開張人氣鼎盛好合理，但朋友仔話威尼斯人酒店個中場好似都冇乜受影響，呢個應該先係金沙最想見到嘅結果，即係個餅做大咗。


新濠平賭枱無影

作為專業嘅分析員，朋友仔仲走過幾條街，去埋新濠博亞（6883）個新濠天地實地考察，就畀佢發現咗個得意現象，原來金沙城中心開幕當晚，新濠天地啲中場收起晒啲300蚊枱。據分析員估計，可能新濠預咗金沙城中心強攻中場，第一晚實吸咗唔少中場客仔，索性收起啲平枱，無謂「吉」咗啲枱，專心服侍高檔客戶好過。