匯控霍嘉治 月底榮休

【明報專訊】曾經坐鎮中環總行，有份帶領獅子銀行上下員工走過2008年金融海嘯艱難歲月嘅匯控（0005）執行董事霍嘉治（Sandy Flockhart），將會喺本月底榮休，喺短短兩個月內，繼前任恒生（0011）副董事長梁高美懿宣布退休後，集團又一猛將功成身退。據知，喺匯豐服務咗37年嘅霍氏，之後會留任匯控董事會出任非執行董事。霍嘉治曾經任職匯豐亞太區行政總裁（現由王冬勝擔任），雖然喺2010年9月匯控高層大換班中，因被調任匯豐歐洲、中東及非洲業務主席而逐漸淡出港人視線，但相信一眾長情嘅匯控小股東對佢仍然印象深刻。小琴就最記得，09年3月匯控宣布世紀供股之後，一向不苟言笑嘅霍嘉治喺記者會上使出「溫情牌」，游說港人支持匯控，並親自接見因不忍「5號仔」被質低至33蚊低位而淚灑熒幕嘅股評人胡孟青，展現鐵漢柔情一面之餘，亦處理咗一場港人對匯控既信心危機。