「魔童」殺入大學揀蟀

【明報專訊】三個新嘅免費電視牌照，如無意外應該今年會發㗎喇。電盈（0008）、城電（1137）同埋有線（1097）三間都摩拳擦掌，準備衝擊免費電視市場。不過小琴就覺得，三間入面以「電訊魔童」王維基領軍嘅城電最積極，唔單止係咁撬其他台啲藝人、導演同編劇過檔，佢仲去埋大專院校搞招聘講座。


據城電講家已經喺網上，收到超過4000份台前幕後嘅申請，仲同咗500個大專生做埋面試。王維基又親身拍埋片搞宣傳，當然繼續發揮佢個寸嘴本色啦，話香港嘅金融同製造業，遲早會畀其他地區爬頭，叫人加入創意行業。小琴覺得「電訊魔童」呢着其實幾妙，唔理到最後有幾多人肯入去做，起碼都叫搞旺咗個台先，第時嗰班去過講座嘅準畢業生，話唔定都會睇多啲佢個台，咁又變相賺咗啲收視返嚟，招聘加宣傳都咪話唔絕。