一手只准講實用面積 恐爭拗公用地方維修

【明報專訊】政府近日就劃一使用實用面積、規管一手銷售等提出草案，姚松炎認為內容未臻完善，當中存在漏洞。


買家有權知道公用面積

他指出，政策走向極端，「由以前乜嘢定義都冇，任得發展商亂講，到家走向另一個極端，只准講一個（實用面積），唔可以講其他」，當只可說明實用面積，不可述及建築面積及公用面積，日後可能會引起爭拗，因業主購買物業牽涉及公用面積，可能要與其他業權人共同承擔維修責任，「買家係買自用面積加公用面積，係以不可分割業權分數買，點解唔可以知道自己買咗嘅公用面積」？「買家未必好想知道佢用唔得着的地方，但若知道佢要承擔維修費和相關責任，就會不同」。


其二，姚氏指出，發水等因素令建築面積定義變得模糊，當局本應為建築面積提供清晰定義，但或許急於上馬，「寧願搵個原本有清晰定義，行咗10幾年嘅實用面積，放棄重新定義」（建築面積）。改變計算單位是drastic change（大改變），適應時間長，估計不少於3年，專業部門的估價可基於指數，但一般市民單看售價，難以與往日售價作直接比較。


違規銷售刑事化 不如設審批樓書機制

另外，將違規一手銷售刑事化方案有違立法動機，一般立法除了發揮阻嚇作用，更應有預防功效，「唔係犯咗罪先用好重的刑罰罰你」，這並非健康的立法精神，而是應成立有審批功能的組織，先審批售樓書，正如新股上市亦要先通過審批。


姚氏指出，草案提出機構有起訴權，但事前無預警，機構有無限權力決定是否作出起訴，「罰人之前，都要畀個機會人地知有冇犯錯先得」。此外，立法只規管一手樓市，總有人會設法將一手變二手，令條例容易形同虛設。