戴維思回港 游說上市公司多請女董事

【明報專訊】小琴喺噚日渣打集團（2888）活動上，碰到前主席戴維思，原來佢喺英國政府換屆後，已經加入咗私募基金公司Consair Capital擔任副主席，不過佢噚日回港唔係搵人投資，而係開宗名義搵埋渣打執董兼亞洲區行政總裁白承睿齊齊講「女」。


大家咪心邪以為佢不務正業，查實係昨日適逢三八婦女節，渣打贊助咗兩個非牟利組織社商賢匯同埋婦女基金會，搞咗個香港恒指成分股女性董事調查，戴維思同埋白承睿為貼應主題，只肯同小琴講有關女性董事嘅嘢。講番個調查，家恒指成分股中，香港女性董事佔比共得9％，同前幾年前無乜分別，但佢地會積極游說上市公司主席，請多啲女董事入局。


話時話，戴維思09年1月獲邀加入英國首相白高敦政府，出任貿易促進及投資部部長，宣布辭去渣打主席一職，令渣打喺香港無咗董事會高層坐鎮，之後就係由白承睿接替佢駐守香港。不過小琴相信佢地一向都不時聚頭，因為間唔中戴維思都有返香港參加渣打舊生會活動，但唔知佢家要睇埋私募基金，仲有無咁多時間呢？