內地人鍾情翡翠珍品

【明報專訊】蘇富比喺4月3日將會舉行珠寶首飾春季拍賣會，拍賣358件名貴珠寶，總估價逾5.5億元。拍賣會負責人、蘇富比珠寶部副主管朱燕儀話，內地人家鍾意翡翠，所以今次佢地有成三分一，即係110件拍賣品係翡翠珍品。


其中最貴嘅一件係天然翡翠雕大肚笑佛鑲鑽吊墜，值成1500萬至1800萬元，朱燕儀梗係賣花讚花紅，話呢個吊墜顏色翠綠，水分足，質地柔細等等。


小琴專登翻查資料，果然翡翠近年喺寶石市場中興起，係其中一項價格升得最快嘅寶石。喺內地，翡翠首飾同擺設廣受歡迎。原來中國人有錢之後，除咗嚟香港買Hermes、炒中銀紀念鈔之餘，珠寶拍賣亦係其中之一。


翡翠價格兩年升逾一倍

翡翠之所以獲內地「大款」垂青，係因為翡翠珍品有投資價值，2010年以嚟，翡翠價格短短兩年已升超過一倍，而新翡翠首飾拍賣亦屢創新高。另外，翡翠好多時候會被雕成佛陀或者觀世音菩薩嘅形態，傳統中國人認為會帶來好運，亦有保護作用，所以唔少內地收藏家都鍾意買嚟投資兼傍身。


8卡方形藍鑽戒值過億

另外，今次拍賣仲有一件矚目珍品，就係8.01卡拉方形鮮彩藍鑽戒指。值成9000萬至1.1億元，係市場上唯一超過6卡嘅鮮彩藍鑽，相信有望打破上季每卡168萬美元紀錄。


email:piano@mingpao.com