金融風暴 三行業最發

【明報專訊】以往講開「暴發戶」呢個名稱，一般係指突然身家暴漲嘅人，原來金融風暴之下，三類人都會成為暴發戶。渣打亞洲區總經濟師關家明話，監管機構、經濟師同傳媒界都會「暴發」增加人手。以佢自己為例，1998年金融風暴期間加入金管局做經濟師時，人手只得3丁友，到佢2005年離開時，經濟師部門足足有成30人，暴漲9倍！


喺無人知道前景時，或者大家都要求神問卜，衍生咗好多行業出來，包括傳媒界嘅朋友。雖然對好多人來講，no news is good news（沒消息就是好消息），但傳媒朋友當然希望有值得跟進嘅新聞啦。


噚日渣打嘅傳媒春茗上，十幾個高級管理層出晒嚟同大家見面，負責介紹嘅行政總裁洪丕正話，以後有乜嘢事都唔使搵佢，搵呢班同事就得！渣打噚日仲搞個小遊戲，估渣打香港上年賺幾錢，喺月底嘅業績公布日時揭曉得獎者，最貼近嘅可以搵一個渣打管理層一齊食飯。洪丕正作為渣打香港揸弗人，睇怕佢都係大家心水之選！