網站擺烏龍 筍盤變空寶

【明報專訊】最近二手樓市出現小陽春，小琴都心郁郁想睇番間心水單位買嚟收租，早幾日同一個朋友講起，原來佢都有呢個諗法，而且陰陰嘴笑住咁同小琴講已經睇中咗個盤，準備打去格吓價就出手。


噚日位朋友打嚟，小琴以為係好消息，點知佢係打電話嚟呻。原來佢響中原個網站睇中咗粉嶺皇府山一個800幾呎嘅單位，標價竟然只係3600零蚊一呎，點知打去問嗰陣，中原嗰邊先同佢講係搞錯咗，個價錢係其他樓盤而唔係皇府山嘅，等佢仲以為搵到筍盤，結果空歡喜一場。


4000蚊呎單位 竟變3600

話時話，小琴睇番資料，皇府山嘅呎價一直響4000蚊以上，突然間有4000蚊樓下嘅筍盤，又唔怪得令朋友雙眼發光，只可惜今次中空寶，希望中原以後都小心啲，唔好再擺烏龍啦。