中銀紀念鈔 未出已升值67％

【明報專訊】中銀（2388）啱啱宣布喺下個星期一（13日）發行「中國銀行百年華誕紀念鈔」，唔到兩日就有錢幣店願意家以每張250蚊港紙落單，收購中銀呢批紀念鈔，即係現時暗盤價已較官方價（每張150蚊）升值67%，以現時股市咁低嘅回報率，小琴聽咗都心動。


有玩緊錢幣收藏嘅朋友同小琴講，噚日有間錢幣店老闆主動打電話畀佢，出價每張250蚊港紙收購中銀今次發行嘅百周年紀念鈔。對方胃口唔細，話「有20張收20張，有200張收200張」，當場嚇親朋友，問佢原因就話有好多內地人想要中銀紀念鈔。


雖然大家都知內地豪客一擲千金，但畢竟朋友同個老闆係第一次接觸，多少有啲擔心對方到時臨場反悔。


老闆可先畀錢 後收鈔

嗰老闆就出埋絕招，話願意畀咗錢先，如果有信心當日可以喺銀行買到20張紀念鈔，就喺嗰日畀定5000蚊，當場跟住朋友買鈔。老闆都幾坦白，話到咗星期一銀行門口可能有其他人收紀念鈔，到時價錢高到300、400蚊一張都唔出奇，「你出來都唔一定會賣畀我！」


內地豪客真有咁鍾意紀念鈔咩？老闆就翻出歷史紀錄，話澳門發10蚊紀念鈔嗰陣時，有人一綑一綑咁收購，一綑就有1000張。其實大家都清楚，現時嘅紀念鈔市場差唔多全部由內地炒家撐起，內地人心思難以掌握，話撤就撤，所以小琴覺得就算心動，都要衡量風險，我哋呢班門外漢唔好太貪心。


email:piano@mingpao.com