南京「賣樓王」 年銷4億近百房

【明報專訊】去年內地樓市全面調控，唔止開發商叫苦連天，連班售樓員都因為冇人買樓而收入大縮水。之不過，中海外（0688）響南京一個樓盤去年就誕生咗位「賣樓王」。呢位叫甘延輝嘅年輕人，2010年加入中海外南京分公司，響2011年全年總共賣咗98個單位，銷售總額達到4億。計起嚟，單單佢一個人嘅銷售成績，已經好過唔少當地樓盤全年銷售總量。


你話早兩年內地樓市好景果陣，甘延輝嘅成績可能只係「濕濕碎」，但去年號稱史上樓市調控最嚴厲一年，南京市亦係限購城市之一，咁都賣出4億真係唔簡單，甚至響12月淡季，佢都可以賣出8個單位，唔怪得之成為南京市樓盤銷售冠軍。


12月淡季 都賣出8單位

「賣樓王」甘延輝被曝光之後，唔少人都好奇佢可以收到幾多佣金，計落就算只係0.1%，佢都可以收40萬，都咪話唔犀利。