星展台子行開幕 馬英九送花牌

【明報專訊】昨天適逢正月十五元宵佳節，星展台灣子行揀正呢個大日子進行開幕儀式，話晒係新加坡最大嘅銀行，講明連任後要繼續發展經濟嘅台灣總統馬英九，聽講原本都係慶祝酒會座上客，但撞正新內閣宣誓就任嘅大日子，未能現身撐場，但都聯同蕭萬長一齊送上花牌，慶祝星展呢個大日子，認真畀面。


08年起進軍台灣

喺昨日早上嘅開幕儀式上，天公作美放晴，令坐落喺台北101大樓附近嘅星展台灣總部顯得寧舍醒神。其實星展喺08年收購當地寶華銀行，今年先正式註冊成為子公司，1月1日正式開始營運，員工由當初唔夠60個，增加到超過1400人，分行網絡更加去到40間，09年開始錄得盈利。台灣總經理陳亮丞話，註冊後可以大力吸收本土存款，而且再開分行嘅限制較細，將來將會擴大客戶群，重點發展豐盛理財同中小企業務。