中海外孔總 養豬起家

【明報專訊】中國海外（0688）主席孔慶平噚日同一眾傳媒春茗，席間講咗個勵志故事。話說有個小伙子以前由養豬開始，慢慢轉型，最終成為一家藍籌公司主席。唔使小琴多解畫，呢名咁有毅力嘅小伙子咪就孔總也。孔慶平帶領中海外創下連續10年複合增長率40%嘅神話，成就超卓。


中海外今年春茗定喺迪士尼樂園白雪公主廳，請晒全港傳媒出席。有冷面笑匠之譽嘅孔主席不嬲都好好傾，噚日席間仲鼓勵班後生記者唔好畏懼地產霸權，可以靠自己勤力，創出生天。


勉勵記者 勤力創新天

佢話自己養過豬，個陣時每日人工3毫子，每餐只可以淨食飯，無錢買餸。一年之後，佢嘅100頭豬已經增加到300頭，佢即刻轉型，變成車餐具嘅工人，每日人工1「蚊雞」，生活提高唔少，有飯又有餸。恢復高考之後，佢日頭車刀叉，夜晚溫書，考入工科名校哈爾濱工業大學建築系，這一次轉型先奠定咗之後嘅事業基礎。