莊友堅千萬掃民豐

【明報專訊】縱橫股海超過30年嘅中南證券揸弗人Eugene莊（莊友堅），係股壇出晒名嘅活躍分子，佢以前作風一向低調，更加絕少親自買賣股票。不過小琴噚日竟然見到佢老人家用咗成千萬買咗3億股民豐（0279），兩年幾以來首次現身，咁啱近排民豐準備供股，莫非內裏有咩玄機？


Eugene個朵喺股壇出晒名，佢旗下嘅中南證券同朱太嘅金利豐，幾乎壟斷晒香港所有三、四線細價股嘅配股同供股包銷交易，中南今次亦有包銷民豐供股。不過Eugene作風一向低調，所以就算同佢關係幾密切嘅上市公司，佢都絕少會實名持有股票。


作風低調 少見實名持股

之但係噚日小琴就睇見佢個寶號「莊友堅」出現喺聯交所股權披露紀錄，資料顯示，Eugene喺年廿七（1月20日），亦即係民豐公布供股當天，用每股平均0.044元喺場內買咗3.01億股民豐股份，總代價約1300萬，持股6.39％。噚日隻民豐報0.048元，即係過完年Eugene已有錢賺。


Eugene同民豐關係一向密切，當時公司大股東仲係「保險教父」楊梵城，佢喺2009年就曾經買過公司股票，但之後就絕迹聯交所，從未出現喺股權披露入面。


話說回頭，前年入主嘅創興銀行（1111）創辦人廖氏家族第三代廖駿倫，小琴聽講佢同Eugene本人就非常老友，當年創興銀行中環總行落成典禮，Eugene都親自落去恭喜佢，撞啱近排民豐準備供股，Eugene又用到自己個名買股票，小琴就真係睇唔通佢老人家個算盤，恐怕都係少沾手為妙啦。


email:piano@mingpao.com