彤叔侄孫：「做」好個股價

【明報專訊】彤叔鄭裕彤搞珠寶地產叻就大家都知，其實佢同好多巨富一樣，對能源呢瓣都好有興趣，最經典嘅有蒙古能源（0276），另外，由佢侄仔鄭錦超打理嘅新時代能源（0166），亦都喺阿根廷搞石油。鄭錦超個侄仔鄭明傑係新時代嘅執行董事，佢噚日就話，新一年嘅目標係做好股價！


嘩！上市公司執行董事話要做好個價，呢啲股價敏感消息，港交所（0388）睇得好實㗎喎！鄭明傑又點會唔知吖，佢嘅意思係話，要做好公司啲業務，到時自然會反映落個股價度。新時代過年前啱啱用九折價錢批股籌咗4000幾萬，將會用喺阿根廷個project度，今年啲業務同股價有幾好表現，大家尤其係新時代嘅股東，就要拭目以待喇。


鄭明傑又不忘讚吓港交所，話自從近年愈來愈多礦業、能源公司嚟香港上市（小琴按：或借殼變身），港交所就呢啲公司嘅提問都愈來愈有水準，好明顯有下過工夫喎。


大讚周大福 「好嘢」買得過

見到鄭家嘅人，好難唔講起彤叔隻珠寶旗艦周大福（1929），周大福個股價前日終於浮上水面，鄭明傑就講到明話：「你問我，我梗係話周大福係好嘢，買得過啦！」鄭明傑話諗返起九十年代末，周大福珠寶搶灘大陸，其實一啲都唔容易，家要再做一次都幾難，言下之意係後來者要同周大福競爭，難度好高喎。OK，明晒。


email:piano@mingpao.com