通脹升溫 港交所利市加碼

【明報專訊】香港通脹有幾勁，相信近排去街市買餸嘅靚太們最清楚。身邊唔少朋友揼晒心口，為舊年冇大手抽「唉幫」（ibond，4208）呻笨，睇住啲銀紙縮水又冇乜符，亦唔寄望政府幫到咩手。不過，估唔到半官方機構港交所（0388）嘅主席夏佳理咁窩心，噚日喺新年開市儀式後，佢照例大派利市畀出市代表，夏佳理就講到明因為通脹關係利市都大幅加碼，由舊年嘅20蚊加到50蚊，當中仲要有Jackpot，有廿封利市係1000蚊，啲出市代表聽到自然開心到紮紮跳。
夏佳理仲講笑話，如果有出市代表抽到多過一封1000蚊利市，可以考慮捐返出嚟，呢個情况最終有冇發生就不得而知啦。
利市派完，夏佳理都有講吓今年嘅展望，佢話龍年全球市場波動，點都會有啲挑戰，但整體來講，仍然保持審慎樂觀態度。佢又話，香港IPO市場集資額連續3年排名世界第一，今年會繼續改善上市機制，發展更多產品，尤其係人民幣產品，但就唔肯講今年新股集資額嘅目標。
IPO世界第一 質素要諗計
計小琴話，與其追求新股年年做世界第一，不如諗諗計提高吓啲新股質素好過。好似舊年經濟麻麻，唔少上市冇耐嘅新股即時現晒形，業績倒退又發盈警咁，連證監會都幾次出聲話保薦人辦事不力，如果靠呢亭質素嘅新股攞世界第一，都勝之不武啦！
email:piano@mingpao.com