巴菲特縮沙 春晚唔獻唱

【明報專訊】原本話會獻唱央視網絡春晚嘅股神巴菲特，臨時脫腳罷唱。上個星期四，春晚嘅籌辦方仲對新華社話，巴菲特為咗上春晚，特登拍咗條片，連春晚嘅總監王平久都讚佢，話「大家都知道巴菲特係股神，其實佢歌唱得都不錯。」搞得不嬲都唔睇春晚嘅小琴，都同內地網民一樣興奮。


點知，啱啱過咗兩日，幫央視牽線搭橋巴菲特嘅陽光媒體創辦人吳征，又出嚟講巴菲特係拍咗條片，不過，喺條片中股神只係講咗兩句比恭賀新禧、新年進步呢類有新意嘅吉利話，要聽股神飈歌，大家恐怕都係上番YouTube溫習舊片喇。


其實早喺2010年，巴菲特就已經喺保險公司Geico嘅宣傳片中，拷貝過80年代當紅搖滾歌星Axi Rose。巴菲特都曾經為內地一家西裝生產商大楊創世出過鏡，睇嚟股神今次就唔吝嗇歌聲，淨係同央視唔夠friend啫。