新聞類別
財經
詳情#
【明報專訊】中移動（0941）雖然已同蘋果公司（Apple）有默契，日後推出符合中移動旗下網絡制式嘅iPhone，但具體方案同埋時間表一直欠奉。不過，呢間全球最大嘅移動通訊商為咗話畀市場知，佢唔會受制於iPhone嘅推出進度，於是率先公布將與蘋果嘅死敵、RIM公司合作，引入RIM為其度身訂做嘅新款黑莓（BlackBerry）智能手機。
據介紹，雙方合作嘅新款手機BlackBerry Bold 9788，將使用中移動國產3G制式嘅TD-SCDMA，亦都係RIM第一款支援相關制式技術嘅黑莓手機，本月起會陸續喺內地面市。小琴聽聞，呢部手機除咗硬件方面跟足中移動要求，手機入面亦預先裝咗一批用配合該公司服務嘅應用軟件，包括隨e行寬帶、號簿管家、手機證券、手機閱讀、飛信等，睇嚟呢次RIM都幾有誠意。
講開黑莓，呢部電話雖然喺歐美都幾受歡迎，市佔率與iPhone不相伯仲，但係嚟到中港呢個iPhone嘅天下，用黑莓嘅畢竟係少數，且大部分為行政人員，所以黑莓能為中移動帶來幾多生意，似乎都係戰略意義大過實際㗎喇！
留言 (0)
