鴻國投資推介會 邀高圓圓坐鎮

【明報專訊】內地知名女鞋生產商鴻國，旗下千百度品牌代言人係內地影星高圓圓。小琴聽講呢次鴻國嚟香港發新股，本周五會喺四季舉辦投資者午餐會，其間會效法之前嘅Prada（1913），為台下投資人送上一場fashion show，特別邀得嘉賓高圓圓盛裝登場。

效法Prada 上演時裝騷

廣告模特兒出身嘅高圓圓，形象一貫清新脫俗，2000年時拍攝嘅清嘴含片廣告，讓人記憶深刻。不過佢都曾經喺2002年版嘅《倚天屠龍記》中演出美若天仙、卻心如毒蠍嘅周芷若一角。

高圓圓喺香港嘅知名度可能不如內地，但年初喺各大戲院上映嘅《單身男女》票房表現不俗，佢就係該片女主角。片中俊男美女雲集，讓觀眾大飽眼福。高圓圓呢次抽空嚟為鴻國撐場，唔知會唔會吸引到一幫投資界粉絲前去捧場呢！