華為誰接班 任正非說了算

【明報專訊】內地最大電訊設備商華為，論實力標青過唔少上市公司，但掌門人任正非低調作風就令呢間公司一向神神秘秘。當然，除左大家好想知佢幾時肯將公司上市之外，呢大半年最令人關注嘅，就係任老接班人問題。

新華社旗下翻舊帳 惹人聯想

去年10月，內地傳出任正非為咗畀個仔任平接班，想用10億元人民幣「分手費」逼走公司董事長兼元老孫亞芳，搞到任正非罕有出面澄清「冇咁嘅事！」而今年4月，華為公布業績同時，亦破天荒披露其神秘董事會成員名單。名單上孫亞芳原職未動，任平沒入選董事會，只有任正非女兒孟晚舟成為新董事會成員，並任CFO。

逼宮傳言不攻自破，最近華為亦交出唔錯嘅中期業績，純利賺124億元人民幣，但就響呢個時候，官方新華社旗下瞭望東方周刊突然又翻起呢筆接班人舊帳，雖然文中冇話任正非係咪又想捧個仔上位，但就強調一點，華為冇上市，冇股東約束，任正非想邊個接班，佢說了算。