恒大許家印 買畫升品味

【明報專訊】內地房地產龍頭之一、恒大地產老闆許家印向來新聞多多，無他，貴為成功人士，坊間自然甚多八卦事流傳。小琴近日就聽聞，許老闆呢輪可能為提高情操，竟然密密飛歐洲，吸收下當地人文情懷，而且為咗回到祖國依然可以接觸到歐陸品味，甚至不惜高價蒐購各時期名畫。

探子向小琴報料話，許老闆都甚有眼光，一意去買歐洲名師之各類畫作，主力就係油畫，雖然密探把口甚密，未肯透露許老闆買入什麼名油畫，不過小琴叫得出、家陣市場又甚有叫座力的，亦不外乎畢加索等名師。

話時話，中國名畫家畫作因為受惠中國富豪崛起，近年在拍賣場上，成交價簡直媲美火箭升空，飇到無譜，反而唔少歐美名師畫作，因為無咁多熱錢炒作，價錢相對穩定，套用一個炒樓詞語，都叫做低水。小琴估計，許老闆掃入名畫，除了話要提升個人情操，增加品味之外，先行囤積居奇再等中資熱錢回頭炒作，然後再善價而沽，應該都係一個幾大誘因。

買豪華遊艇 傲遊四海

許老闆同華置主席劉鑾雄咁老友，而大劉又向來鍾情古董名畫，想來許老闆突然興起買畫之心，都唔多唔少係向大劉偷師也。之不過，名畫陶冶性情，物質生活都唔可以少。探子仲爆多單料話，原來許老闆最近斥巨資買左一艘新遊艇玩吓。探子話索價高達3億、4億之譜。小琴唔多識遊艇市價，但聽朋友講，一般幾千萬一艘遊艇都幾豪，過億已經叫超豪，如果真係成4億，應唔係叫遊艇而係郵輪了，所以小琴都係姑且聽住先。

報料電郵﹕piano@mingpao.com