馬化騰再度賤沽騰訊

【明報專訊】嘩！QQ之父馬化騰再次賤價沽騰訊控股（0700），不過各位QQ股東唔使太過擔心，事關據港交所披露，馬化騰禮拜一係場外以144.325元沽貨500萬股，相當於公司0.3%股份，比當日折讓約兩成，相對於今年4月期間，用低過四折價錢「大平賣」，今次真係蝕少好多。小琴幫馬化騰計一計數，原來今年由3月至今，QQ之父多次賤價沽貨後，帳面損失已超過15億元（見表）！

3月至今已蝕15億

今次馬化騰套現7.2億元，但由於批貨比當日市價折讓兩成，所以佢實際上唔見成1.76億元。看官都知，佢老哥喺2009年期間，簽訂Collar Option（有譯作雙限期權或領子期權）嘅期權產品合約，等佢可鎖定沽貨股價同收取期金。點知騰訊股價大升，搞到馬化騰被迫大折讓沽騰訊。

料簽了兩份Collar Option

相信大家都奇怪，點解今次沽貨價錢無先前咁低呢？有投行衍生工具部人士話，早前3至4月到期嘅1000萬股喺09年3月申報，至於今次就係9月申報，相信係兩份Collar Option，佢估計「騰訊09年由年初40幾元，一直猛抽上去120元，可能馬化騰見勢色唔對，於是忍唔住簽多一份定價係144元沽貨嘅Collar Option，諗住可以止蝕兼翻身。」點知到騰訊升勢一浪接一浪，仲曾經升穿200蚊，止蝕唔成，變輸多兩錢。馬化騰仲有93萬股Collar Option係明年1月到期，相信過埋呢次，馬化騰應該唔會再賤價沽貨喇掛？