【明報專訊】實力建業（0519）大股東洪建生近排因為家庭糾紛搞到鬧上法庭，佢今日就同現任老婆Betsy Chen齊齊登報大反擊，Betsy就澄清同洪生係喺離婚之後先開始拍拖，根本唔係情婦，而洪生就仲爆，佢話懷疑「有人」因為妒忌搞到精神有問題而多次騷擾佢，搞到佢要考慮請保鑣保護人身安全咁話喎！
畀前妻王家琪入稟懷疑濫用公司資源包養情婦嘅洪生話，近半年多次受到私人電話騷擾，懷疑有人因為妒忌而搞到精神有問題，為咗保護自己同家人安全，所以考慮請返個私人保鑣，甚至申請法庭保護令咁話喎。
指離婚後先同現任妻子拍拖
畀王家琪指係情婦嘅Betsy就似乎非常唔順氣，佢話洪生同王家琪其實早喺2000年已經簽咗離婚紙，而「出生鄉下，思想保守，一直未有拍拖」嘅佢，係喺洪生單身之後先開始拍拖，佢兩個仲喺上年4月簽紙結埋婚，所以絕對唔可以用「情婦」嚟稱呼佢。
妻工作月入3萬 話無用公司錢
Betsy話，洪生喺簽紙離婚之後，王女士就住山頂豪宅，仲有公司車管接管送，洪生就搬去酒店公寓住，到咗07年先賣咗佢手上900幾萬股票加埋問銀行借咗950萬買別墅，其中根本無動用過公司錢。而Betsy佢本人有晒大學學位同碩士文憑，喺04至07年洪生一個人響英屬處女島搞度假村項目期間，Betsy要出入接送、替洪生安排會議、處理文件咁，每個月收3萬蚊就似乎想講自己價錢合理喎。
講到話洪生捐錢畀Betsy母校芝加哥大學，但原來洪生同佢嘅仔女都係芝加哥大學畢業，即係話捐錢係合情合理啦。正所謂家家有本難唸的經，法官前日就批准咗王女士翻查實力嘅財務文件，行筆至此睇怕佢都仲喺度埋頭苦幹緊，咁喺法律程序嘅嘢小琴自然不便同大家評論太多。但睇Betsy同王女士連日嚟空中罵戰，恐怕洪生都唔會好受得去邊，小琴喺度奉勸各位男士，處理感情事時真係務必要小心，小心。（聲明啟事刊A14、A15版）
報料電郵﹕piano@mingpao.com
