超人增持和黃 業績後首次

【明報專訊】近排個市大上大落，好多股民都同小琴吐苦水，話手上啲股票輸咗唔少錢，喺呢個人心最脆弱嘅時候，向來被散戶視為入市指標嘅「超人」長實（0001）主席李嘉誠今個星期一（22日）就終於出手，喺業績後第一次增持和黃（0013），莫非暗示佢覺得和黃家股價好抵？

話說超人每年喺長和系業績後都會例牌增持下，支持自己兩隻上市旗艦，今年8月4日公布中期業績之後，佢就一味猛咁增持長實，小琴篤篤計數機，原來超人已經喺唔夠1個月之內，增持咗10次長實，其中仲係連續7個交易日增持，總共買咗232.6萬股，用咗差不多2.5億港紙！

70蚊買入 斥2030萬

不過奇怪嘅係，雖然超人係咁增持長實，但就無掂過和黃，唔少和黃粉絲等到頸都長埋，終於呢個星期一佢第一次增持，用平均價70.093元增持咗29萬股和黃，即係用咗2030萬元，同日仲停止咗增持長實。小琴諗諗超人終於增持和黃，係咪佢老人家覺得個價夠晒抵？不過有老友就話，超人幾千億身家，大把本錢坐艇，小琴即時就無再諗啦。