期油輪 疑似烏輪翻版

【明報專訊】高盛「烏輪」事件，隨住瑞銀以蝕本價接受回購似乎已暫告一段落，不過，蘇皇（RBS）有隻期油輪尋日就一度被投資者質疑為似另一隻烏輪，成交亦大增。

匯率條款 兩隻輪完全相反

話說RBS有隻期油窩輪（10084），條款同法巴一隻期油窩輪（10013）極相似，計價程式更加一模一樣，唯一唔同就係關於匯率嘅定義，RBS係話按「路透社ASFI專頁所報美元兌港元匯率之買入價」，法巴就話係按「港元兌美元的買入匯價」，照字面睇兩間行採取嘅匯率完全相反。

有投資者打去兩間行問，兩間行都話自己啲文件冇問題。兩間行都話，邊種寫法都好，路透社ASFI個專頁，都係得美元兌港元嘅報價，好似尋日下午兩點個報價係7.7911，所以兩間行都係用呢個價計。

小琴覺得，如果齋睇字面解釋，的確令人疑惑。有探子回報，話法巴可能會更改返啲中文字眼，而未來新出嘅窩輪算式部分會更詳細啲。其實高盛「烏輪」事件一役後，投資者已經杯弓蛇影，形住啲terms可能出錯兼且輪商可無限「屈機」，呢樣嘢真係要靠啲輪商推出產品時謹慎處理，才能重建投資者信心喇。