國浩跌市擲四千萬掃東亞

【明報專訊】上星期恒指跌穿2萬點，但一眾散戶心不死，齊齊入市撈底博反彈，一向對東亞（0023）虎視眈眈嘅國浩（0053）亦趁機買貨，喺恒指插水逾1000點後第二日，即上周三，豪擲4012萬掃入東亞140萬股，買入平均價28.66元，令持股比例升1.02個百分點，達到12.04％。

國浩對上一次公布增持都差不多3個月前，當時比今次買入價高出差不多3元。事實上，國浩以往都有吼東亞股價低迷時入貨，睇嚟佢對東亞都幾睇好，咁又啱嘅，東亞中期純利創新高，喺近日個市受歐債危機消息拖累，東亞都同樣跌價啫。而家股市相對回順，東亞個價都慢慢升返上去，埋單計數，截至昨日呢手貨只係微賺5.6萬元，不過以國浩咁想投資東亞，睇嚟佢仲會繼續買上去呢。

增持之後，國浩仍然係東亞第二大股東，最大股東係主席李國寶嘅好朋友、西班牙銀行Caixa Bank。