新聞類別
財經
詳情#
【明報專訊】小琴尋日同華潤水泥（1313）一眾高層食飯，席間董事長周俊卿介紹華潤水泥喺賀州嘅零排放項目，水泥廠可以零污染？小琴聽得好有興致。賀州係廣西嘅一個小城，山清水秀，周主席話嗰度啲人都好長壽，見到107歲嘅老人家仲好好精神。小琴Google咗賀州，原來森林覆蓋率超過七成喎，空氣質素梗係一流。
水泥廠建喺咁美好嘅地方，大家個心唔知會唔會沉一沉呢？不過，周俊卿就介紹，佢地建咗一個「循環經濟產業園」，園區內3間工廠，一間係華潤電廠，一個自然係華潤水泥廠，另一間係雪花啤酒廠。水泥廠就向電廠、啤酒廠提供初期建設用嘅水泥，並向電廠提供脫硫用嘅石灰石粉；電廠就向水泥廠供電，再向啤酒廠供應蒸氣，所以啤酒廠不需要另外建設鍋爐房；而電廠產生的粉煤灰、爐渣、石膏以及啤酒廠產生的廢硅藻土等廢物，全部畀水泥廠做燃料；啤酒廠產生的廢水再由電廠回收利用。如此一來，資源循環利用，污染零排放！
電廠供蒸氣畀啤酒廠 慳鍋爐房
賀州當地報紙稱，呢3個項目在園區內構成的小循環，就能節約用地1000多畝，節省建設費用8668萬元。
睇來，大公司嘅協同效應唔單只互相借下錢咁簡單，小琴真想親身赴賀州體驗下呢個零污染項目，大家多啲環保心思，其實改善生活環境都唔係咁難啫！
報料電郵﹕piano@mingpao.com
留言 (0)
