周啟邦夫人預留3伙西浦

【明報專訊】樓市今年升得快，雖然政府出招令樓市降溫，但都無阻一班闊太入市。最近嘉里（0683）喺西環有個新盤叫西浦，市傳一向活躍於豪宅市場嘅周啟邦夫人周譚月清，已經預留咗3個高層單位，共8000萬元，計落呎價約2萬元。

嘉里係發展商嘅西浦，係西環單幢盤，今次推出132伙，由於上個禮拜六先至派價單，所以最快都要今日至可以正式落實買賣。但周啟邦夫人就好醒目，一早預留咗3個靚單位。

合共8000萬 呎價約2萬

查實投資了得嘅周啟邦夫人，一向都有投資物業，而且買樓好似買菜咁，周不時一次過掃幾個單位。好似今年3月，佢就以逾3.4億元，購入盈大（0432）旗下薄扶林貝沙灣5期兩座洋房，呎價約2.7萬元。喺舊年11月，佢又連續沽出赤柱富豪海灣2座洋房，帳面合共賺咗1138萬元。又喺舊年10月，佢以4600萬元買入5伙位於馬鞍山嘅天宇海單位。

買樓如買菜 長揸又摩貨

唔只住宅樓宇，周啟邦夫人投資商廈都有一手，早前持有香港仔黃竹坑「One Island South」一全層樓面，就以約2.5億元，呎價約8500元「摩」出，勁賺約6500萬元。上個月，周啟邦夫人又斥逾億元入市，購入觀塘俊匯中心6樓餐飲用途樓層以及一批車位，涉資1.2億元。

報料電郵﹕piano@mingpao.com