【明報專訊】iPhone熱潮內地風行無兩，但內地有一班後起之秀正要挑戰iPhone嘅地位。講緊嘅係內地各大互聯網巨企——阿里巴巴網絡（1688）母公司阿里巴巴、騰訊（0700）、百度和小米等等。噚日，使用阿里雲平台的阿里巴巴手機圖片喺網上曝光（見圖），報道話手機將會喺7月底正式發布，售價估計高達2800元至3000元人仔，唔知你又有無興趣？
阿里巴巴聯同內地廠商天語推出，呢部名為天語W700手機，全是國內自主研發，認真係「土炮」國貨。天語原定於今年3、4月推出嘅手機，但由於最後決定同阿里合作，所以推遲面世。賣到成3000元咁貴，呢部阿里雲手機有咩特別呢？答案就係背後嘅「雲」字喇，呢部手機載有大量阿里推出的雲軟件，包括雲搜索、雲存儲等等，大量應用程式亦會上載到「雲」上，只要用戶一上網就能應用，擺到明要同Google、蘋果今年大力宣傳嘅雲概念睇齊。消息講，阿里巴巴7月會正式同大家發布呢部手機，8月喺內地正式開售。
網企齊齊攻手機 賣App分杯羹
其實，內地唔少互聯網巨企，眼見Google同蘋果嘅成功故事，都好有興趣喺下半年推出自家手機，創一番事業。好似騰訊去年已經推出咗第一部搭載大量QQ軟件嘅QQ service手機，其他嘅型號亦陸續有來。
內地傳媒亦報道百度大有機會同聯想（0992）合作，推出Android平台智能手機，百度又將會如Google一樣，推出手機版嘅搜索、地圖。不過，百度方面就一直冇正面公布佢地嘅計劃，唔通學咗蘋果，事事要保持神秘？另外，由金山軟件（3888）現任主席雷軍創立的小米科技亦都聯同美國品牌摩托羅拉聯手推手機，料售價大約為2500至3000元，分析話互聯網企業都賣手機未必帶動收益太多，但往後嘅應用程式分帳、廣告先至係金蛋。本地薑已經咁多對手，再加上世界各大手機品牌都有意染指內地，相信內地手機市場下半年勢會風起雲湧。
報料電郵﹕piano@mingpao.com
