李寧股價每日創新低

【明報專訊】體操王子李寧轉行入商界之後，本來品牌都做得好哋哋，不過近一、兩年唔知係咪掛住玩「財技」而忽略本業，李寧（2331）自從本月初發盈警後，股價就一直下跌，而且低處未算低，幾乎每日都創一年新低，澳洲聯邦銀行同埋摩根大通，就雙雙大手減持李寧。

聯交所資料顯示，澳洲聯邦銀行本周二及周三，連續減持李寧近2000萬股，共套現近2.8億元。喺周二，澳洲聯邦銀行以每股11.752元在場內減持907萬股；喺周三，則以每股10.539元減持1048.9萬股，依家持股量由8.44％降至6.59％。

至於摩通，就喺上周五以每股10.52元，場內減持914.15萬股，套現9616.8萬元，持股量亦由7.22％降至6.36％。

事實亦證明佢哋減持得有道理，因為李寧噚日收市價已經跌到8.96元，市值得番95億元，亦進一步邁向海嘯價8.5元。

至於李寧方面，為咗表達對公司有信心，CEO張志勇同CFO鍾奕祺就喺本周二同三增持，合共以122萬元增持12萬股。不過好明顯佢哋增持只可以表達管理層對公司嘅信心，而唔可以令股民對李寧有番信心。