嘉道理家族增持大酒店 3日唔見成千萬

【明報專訊】嘉道理家族除咗係中電（0002）大股東外，大酒店（0045）都係佢旗艦公司之一，今個星期一仲一擲1.5億元大手買入大酒店1140萬股，呢次仲係佢哋自從喺09年11月之後，單日計最大手筆嘅增持行動！

當日嘉道理以平均每股13.482元買入，不過睇返當日股價表現，呢個價都算係高位，因為當日大酒店收報13.04元，噚日大酒店收市價跌到落去12.44元，嘉道理家族帳面蝕逾千萬，但佢哋長線持有，過去多次增持嘅成本好平，所以真係冇乜所謂，相信會繼續買落去。睇返嘉道理家族都係6月開始，先較為頻密咁增持番大酒店，計埋今次增持後，家族已揸住大酒店股權51.89％。