蒙能遇大危機

【明報專訊】鄭裕彤嘅投資出名百足咁多爪，除咗新世界系之外，佢炒過嘅股票一籮籮，近年最落本嘅，肯定係蒙古能源（0276）。彤叔注咗數以十億元計資金，家揸住差唔多兩成嘅蒙能，之前被核數師質疑佢合共132億元嘅項目嘅專營權可能被撤銷，隨時資不抵債。不過，彤叔公子鄭家純噚日就好老定咁話﹕「唔清楚喎！」

噚日純官喺新世界發展（0017）股東會後答記者問題時就話，仲未同管理層溝通過，唔清楚成件事。蒙能單新聞出街之後，噚日跌咗一成一，彤叔帳面都唔見咗1.5億元，不過對於家產數以千億計嘅鄭氏家族，都只係濕濕碎啫。

近排鄭家高調收集佐丹奴（0709）股份，但後着一直保密，鄭大公子唔評論會唔會繼續增持，或者派員進入佐丹奴董事局。有傳有跨國時裝公司想收購佐丹奴，鄭家純就話無人向佢地接洽喎。

稱新礦「已全數獲認購」

至於由新創建（0659）分拆嘅新礦資源（1231）配售唔足額，要包銷商「啃」咗佢，鄭家純就撐﹕「據我所知已經全數獲得認購，唔會延遲或者擱置上市。」不過佢承認，間間公司都想喺最好嘅市况上市啦，但「都唔知等到幾時」，不過最緊要都係令公司有足夠資金嚟到做好營運。