新聞類別
財經
詳情#
【明報專訊】近期內地央企流年不利，頻頻身陷醜聞之中，而且負面報道層出不窮，好似前排中石化廣東公司爆出「天價酒」事件、中國移動高層違紀被查，中海油被爆出人均38萬元年薪等等，上個月國家審計署仲公布埋另外17間央企消費不清、假發票等問題。
「賺錢愈多，捱罵愈多」可以話係央企寫照，其實早響2008年，有關部門已經推動建立央企新聞發言人制度，並對外公布120間央企新聞發言人的聯繫方式，講到明24小時不關手機，以塑造央企滿足公眾知情權的良好形象。央企自己亦聘請一些內地輿情機構及公關公司來應對媒體，監測輿論情况，據講，淨係呢方面的開支，少則年花數百萬，多則投入上千萬。
經過呢幾年的博弈，央企都算深諳輿情監測之道，因為不少事件起端源自網絡，曾經就有傳有央企安排員工響主要網上論壇及博客註冊多個用戶，以「老百姓」的身分為公司講好說話，粉飾太平。
年花千萬 聘公司搞公關
其實做得唔好，點樣粉飾都抵畀人鬧，之但係有時候，就算做得好，央企一樣要畀人指指點點，中石化內部食堂員工以蘿蔔舉例談節約，就被外界傳為笑柄。
有研究學者就解釋，央企之所以成為民眾「眼中釘」，正因為佢地賺得多，市民卻享不到，體現的是對收入分配不滿的社會現狀。
報料電郵﹕piano@mingpao.com
留言 (0)
