新聞類別
財經
詳情#
【明報專訊】東亞銀行（0023）主席兼行政總裁李國寶一早已過咗退休之齡，但就畀董事局落「柯打」要佢再坐一會。唔止要忙家族銀行業務，寶哥哥佢身兼近排動作多多、再搞分拆嘅電盈（0008）嘅獨立非執行董事，有小股東本身就係想搵佢幫手出頭，不過原來佢啱啱做完盤骨手術，雖然已經回到工作崗位，但都仲喺休養階段中，睇嚟電盈小股東要再搵人幫手喎！
李國寶既代表金融界擔任立法會議員，又係電盈獨立非執行董事，代表小股東監察公司，所以電盈小股東大聯盟就諗住向李國寶求助，因為公司最近想分拆電信業務信託上市，就激到班股東紮紮跳，認為係「溫水煮蛙式嘅曲線私有化」，小股東仲讚寶哥哥「永遠站在正義的這一邊」，所以香港永遠唔會出現東亞小股東大聯盟咁喎，咁樣落嘴頭，就係想寶哥哥幫手出言勸吓電盈班老闆咪搞咁多嘢！
啱啱做完手術 暫時要休養
不過寶哥哥啱啱做完手術，暫時都唔得閒幫小股東出頭住。話時話，李國寶今年先抱男孫（細仔李民斌添丁），又娶新抱（大仔李民橋再婚），應該都喜上眉梢，小琴記得佢出席大仔婚禮時，都要以輪椅代步，或者都係時候認真考慮退落嚟，享受天倫之樂喇。
報料電郵﹕piano@mingpao.com
留言 (0)
