新聞類別
財經
詳情#
【明報專訊】憑住旗下半山「垃圾崗」豪宅The Icon「一夜成名」嘅榮豐國際（0063）原來玩花招好叻，除咗近排被發現識玩「乾坤大挪移」之外，成班股東原本揸住擁有市值超過30億物業嘅上市公司股票，變成揸住一堆無法交易嘅非上市公司股票嘅小股東，佢哋噚日齊齊踩上股東會後，就同小琴投訴公司玩埋「拖字訣」，話要出年先可以畀個解決方案佢哋喎。
西裝友代客投票 平時少見
由新加坡鍾氏家族持有嘅榮豐，2007年將市值隨時過30億嘅物業轉入一間非上市公司，換成將一間非上市公司鴻福地產嘅股票畀小股東，小股東黃小姐同小琴講，榮豐股價猛咁跌之餘仲唔派息，搞到佢哋雞毛鴨血，所以就要求公司回購鴻福畀佢哋套現，家公司話一年後先畀答覆，有位已經86歲嘅小股東就話驚自己等唔切。
小琴噚日仲觀察到，噚日股東會上面出現著晒黑色西裝同套裝嘅律師代客戶投票，黃小姐就話佢哋個個都係揸嗰幾千股，而且有小股東仲話以前唔多見其他人出席，唔通「乾坤大挪移」同「拖字訣」之外，仲識玩埋「故佈疑陣」？
留言 (0)
