星謙買會籍 打Golf傾生意

【明報專訊】內地做生意一向講究人際關係，小琴經常聽啲朋友喺內地做生意，周不時都要請吓食飯、飲吓啤酒咁，不過工業股星謙（0640）就寧舍有新意，拎咗144.4萬買咗5個高爾夫球會籍，實行同啲客打多啲Golf，打好關係咁話喎。

星謙話今次收購會籍「可為現有及潛在客戶提供娛樂，實屬本集團建立業務關係的良策」，於是向主席兼大股東楊淵、兩名執董葉展榮同葉嘉倫收購5個高爾夫球會籍，其中1個係澳門1間高爾夫球鄉村俱樂部特級會籍，1個係珠海翠湖高爾夫球會，其餘3個全部係珠海國際高爾夫球會，公司話衡量過而家二手高爾夫球會籍市價後釐定，全部5個盛惠144.4萬。

小琴自己就唔識打Golf，所以唔清楚會籍市價幾錢，不過根據網站mformembership嘅資料，珠海翠湖同珠海國際兩個地方嘅高爾夫球會籍價錢，即使貴啲嘅公司會籍約莫10零萬港紙1個，計埋都唔洗80萬，咁睇嚟嗰個澳門特級會籍真係好貴喎。