新世界售樓部 新紮師姐上場

【明報專訊】不經不覺，在地產界有相當江湖地位嘅新世界（0017）梁志堅（堅叔）已經榮休咗幾個月，噚日新世界就喺旗下西環新盤寶雅山搞記招，表面上係介紹樓盤嘅售樓工作，實質係要向傳媒介紹佢哋嘅售樓部新團隊，當中最吸引小琴眼球嘅，就係營業及市務副總經理鄭靜如（洋名Viola），因為呢位新紮師姐之後將會係新世界賣樓部嘅主將。

江湖近日有傳聞指，話向來以形像高貴見稱嘅新世界代理執行董事何伍燕榆，亦會好似堅叔咁榮休享清福，Viola噚日就冇正面回應此問題，只係強調何太家仲返緊工。

講番Viola，佢1988年加入新世界，之前一直負責工程策劃工作，係地產界已有相當經驗，到最近才被調到售樓部負責銷售工作。另一引起小琴興趣嘅係，Viola姓鄭，莫非係「彤叔」、「純官」等高層嘅親戚？Viola好爽快咁回應﹕「我只係打工，鄭先生係我嘅大老闆，同佢地絕對唔係親戚。」