百度李彥宏 成內地首富

【明報專訊】無論係乜嘢國家嘅人，小琴敢講大部分其實都有鋪「排名癮」，而近年排名排得最密嘅可能就係富豪榜，美國《福布斯》噚日公布嘅2011年華人富豪榜，頭三名全部由香港地產富豪一手包辦。內地首富就由年輕才俊、百度大股東李彥宏奪得。百度多得Google撤出大陸所賜，股價喺美國愈升愈有，李彥宏自然身家暴升。

華人富豪榜 前四全為港地產商

據《福布斯》排名，長實（0001）主席李嘉誠以260億美元身家繼續第N次蟬聯全球華人富豪榜首，第二位係新地（0016）郭炳江同郭炳聯兄弟，「四叔」李兆基就輸個馬鼻排第3，嘉里建設（0683）大股東郭鶴年排第4。今年以94億美元身家成為中國首富嘅李彥宏，就排咗個「梗頸五」，但超越了娃哈哈老闆宗慶后。至於近排因為伙拍「殼王」陳國強入股TVB嘅王永慶長女王雪紅就更加唔使講，排第8，亦成為台灣首富。

雖然好多人話呢班富豪榜可信性唔高，皆因富豪身家唔會揭穿肚皮畀你數，不過總有少少可以分析嘅地方，好似《福布斯》話中國今次有115位富豪上榜，香港就得35位富豪，咁嘅情况似乎反映，相比內地，香港財富非常集中響某幾位富豪身上囉。