劉德華成OSIM吸金王

【明報專訊】賣按摩椅嘅OSIM鍾意搵代言人推銷，過去嘅亞太區代言人都係巨星級人馬，90年代搵劉嘉玲，2000年開始有王敏德、鞏俐、古天樂、台灣組合S.H.E、名模林志玲等等，而最新一期嘅代言人劉德華推介天王按摩椅，聽聞生意不俗，成為OSIM吸金王。

OSIM新加坡集團財務官李懷吉向小琴講，至目前為止，劉德華係最高銷量嘅代言人之一。OSIM今年初發布全年業績時，李懷吉亦向新加坡傳媒講到，天王椅賣到斷晒市，要趕製咁話。

明星代言 攻大陸市場最見效

產品銷向大陸市場，都鍾意用代言人，最為人熟悉嘅係霸王（1338）洗頭水搵王菲、成龍，最近碧生源（0926）由徐靜蕾做生招牌產品賣減肥茶。代言人速銷係咪萬試萬靈呢？香港市場產品學會主席嚴啟明話，搵代言人嘅好處係立即打響名堂，特別喺大陸市場咁大，知名藝人一出現，消費者都會對品牌有印象。不過，代言人成本不菲，但未必保證回本，咁啱藝人出現負面新聞，品牌要重新建立形象。佢又話內地通過廣告法保障消費者，代言人如果推銷食嘅產品有問題，都要承擔部分法律責任。

報料電郵﹕piano@mingpao.com