唔簽無綫經理人合約　自己接工作　楊潮凱：我想有番自主權

【蘋果日報】【娛樂人物】楊潮凱09年入行，曾修讀無綫藝員訓練班，11年在戚其義監製的劇集《天與地》中飾演少年陳豪而被觀眾認識，其後工作機會漸多，轉眼間已加入無綫十年，34歲的他日前在社交網宣佈與無綫結束經理人合約，改簽普通藝員合約，接受新挑戰，他說：「我想有番自主權。」
撰文：何慧斯
攝影：陳俊強
楊潮凱日前在銅鑼灣接受《蘋果》專訪，對於決定與無綫結束經理人合約，改簽普通藝員合約，他說：「真係唔容易，之前問咗好多朋友，佢哋都覺得呢幾年我嘅發展都幾好，多咗好多機會，如果依家走會少咗呢啲機會，但諗深一層，我喺呢個地方已經十年，想試吓同其他唔同單位合作，簽經理人合約要以公司嘅製作行先，某程度會放棄其他機會，所以我想有番呢個自主權。不過我喺呢個地方仲好想同其他監製、演員合作，所以咪同公司提議不如選擇藝員合約。」
曾怨運氣不及同學
在娘家十年，楊潮凱表示每個階段都對自己有交代：「啱啱喺訓練班出嚟，有時會諗點解同學會接通告先過我？嗰陣雖慶幸已劇接劇，但係冇一個空間畀自己去思考，之後可以點樣去演出，同埋好多嘢都浮沉，好似拍《天與地》，睇到張rundown係場場都有份，但拍完後即接另一套戲外景，雖然都係場場有，不過只係喺後面，嗰個落差真係好大，都會問自己，究竟係咪公司唔鍾意我？」
楊潮凱續說：「呢段時間維持好幾年，之後公司同我簽經理人合約，唔代表安排啲位越嚟越好，呢個好現實，唔通我唔做嘢？我都要食飯，我見到啲同事做得唔係特別好，我又唔係做得特別差，點解佢嘅機會好過我？」迷失後，他終於想通：「所有嘢係運氣，呢個行業真係需要運氣，好戲同有能力當然重要，不過如果加埋好運，條路會行得好順，我唔係呢類人，惟有做好自己，希望做到人哋唔搵我，係佢哋損失。」
回想當年少少戇居
回想起來，楊潮凱覺得當時自己有少少戇居，他說：「我第一日入訓練班，係想做一個演員而唔係明星，點解要追求啲咁虛無嘅嘢，我今日做到主角，聽日可以唔係，點解要追求呢啲，而唔係做好啲戲，等個角色多啲人鍾意咪仲好，諗通就知道自己條路點行。」
到了15年，楊潮凱向公司請了一個月假放空：「真係好任性，與其怨都唔會改變到世界，只係繼續沉淪，惟有自己掹番起自己，呢個經歷對我真係好好。依家你問我係咪好有把握，一半一半啦，有啲嘢都係講機緣，我只可以做嘅係將自己最好嘅嘢畀大家睇，嘗試同多啲人接觸。」
囡囡成賺錢動力
楊潮凱2013年底跟拍拖11年的圈外初戀女友江玉儀結婚，去年太太為他誕下囡囡楊心悅 ，一家三口幸福美滿。楊潮凱升呢爸爸後，女兒成為他要更努力賺錢的動力，要給妻女最好生活。
問楊潮凱在這個時候和無綫改變合作模式，不怕冒險嗎？他笑說：「其實初初都有擔心冇穩定收入，正所謂手停口停，不過同太太傾完，佢覺得如果我有咁嘅諗法，不如去做，過咗幾年想走都走唔到，亦未必有呢團火，所以咁啱之前簽嗰七年約又完，可能今次係一個好嘅契機畀我去試。」
長青網 - 一站式長者及護老者生活資訊網站