【馮仁昭四圍超】子華開戲　心悠打拳

【蘋果日報】現年58歲黃子華舊年喺紅館做完《金盆顦口》後，講明唔再做棟篤笑，不過佢從來冇打算收山嘆世界，之前仲因為幫朋友，經常喺唔同公開場合出現，而子華自己嘅project，就係會喺9月開拍一部愛情喜劇，子華仲會自導自演，而女主角已經揀定劉心悠，片中心悠會演一位女拳手，同子華會有感情戲發展，而心悠為咗能夠打得似模似樣，開戲前特別接受拳擊訓練。
盼承接《棟篤特工》
噚日問過子華經理人，佢話：「子華喺下半年會自導自演一部新片，今次係同心悠合作，依家子華閉關搞劇本，所以我都唔會打擾佢，因為故事仲未出嚟，所以好多嘢都唔方便透露，可能再過幾個月啲嘢會明朗化。」
17年前子華首次自編自導電影《一蚊雞保鑣》，但當年票房只得11萬元，但去年上映、同佘詩曼合演嘅《棟篤特工》票房收逾4,470萬元，成為去年最高票房嘅香港電影，相信唔少子華嘅fans，都好期待睇佢嘅新作，票房應該會有保證。
撰文：馮仁昭
長青網 - 一站式長者及護老者生活資訊網站