足球場難求11人場$278炒上$1,200

【蘋果日報】「越來越多人鍾意踢波，但足球場難求，晚上或假期黃金時段，無論草地、人造草，甚至免費嘅石地都有炒場，貴原價四至五倍都有價有巿。」業餘球隊領隊阿勇透露，康文署推出電腦抽籤後，炒場情況仍熾熱，他指草地場每節租金7人場168元、11人場278元。巿區搶手球場如摩士等，7人場可炒至900元，11人場約1,000至1,200元。他推算案中被搗的集團有124張假證訂場，當一半即62張每月中籤一場，扣除成本，每月可淨賺四萬多元。
炒場有價有巿　騙徒超賣
阿勇透露，炒場的賣家主要活躍於網上足球討論區，他們大多以「場地多出」、「全張出讓」或「約隊友賽」作招徠，會列明日期、時間及地點。「全張意思即是整個球場出讓，有意者可以私訊聯絡。友賽除了是對方有球隊可以安排場地對賽外，搞手亦可幫手聯絡兩隊有意在同一時段炒場球隊對賽，場租由兩隊平分；如草地11人場炒至1,200元，每隊600元，一隊十幾每人夾幾十元，較化算，亦容易出讓。」
阿勇指一般炒場賣家，會安排人員持場紙到場交收及簽場，亦有人要求用電子錢包過數，但多數買家會要求對方到來簽場才付錢交易。他指賣家為防執法部門放蛇，交易時小心翼翼，「我曾在網上見有人放旺角麥花臣石地場周末晚上時段，雖然場地免費但難訂，對方索價200多元，寫明要以『郵票』交收；我聯絡對方喺港鐵站交收，仲特登買咗200幾蚊郵票，點知見面時，對方話郵票只是暗號，實收現金。」
由於炒場有價有巿，亦有不少騙徒搵食，另一領隊阿Tim曾幫襯網上炒家，「個11人草場開價1,000蚊，賣家話幫我哋約對手，每隊500蚊，但要先過數，再WhatsApp場紙畀我哋。點知去到球場時，發現唔係多一對，係有三隊，即總共四隊球隊到場；大家都話網上過咗數，又有WhatsApp場紙資料，打番畀賣家，結果係電話唔通玩失蹤，先知係超賣騙局。」
■記者謝頌昕
長青網 - 一站式長者及護老者生活資訊網站