中環在線：南豐紗廠活化　阿松帶隊參觀

【蘋果日報】 有超過半世紀嘅荃灣南豐紗廠活化成為The Mills，南豐CEO梁錦松（阿松）帶隊參觀，紗廠冇做工廠後做貨倉，2008年停運，活化工程2014年開始，去年底竣工，其中一項大改動，係將工廠幾層樓打通，頂層改做玻璃天幕，引入自然光，十分開揚。The Mills引入多間特色小店，又有作坊培育初創公司，唔止係文青打卡嘅地方。
南豐保留廠房紀念創辦人陳廷驊，阿松話如果只係睇盤數，一定唔會搞活化舊工廠項目，不過南豐唔係上市公司，「可以睇大數唔睇細數，相信長遠對公司有幫助。」
阿松旗下新風天域，近日以11億人幣買咗深圳福田區一間「爛尾」醫院，打算再投資11億人幣做高端醫療服務，佢話間醫院當年設計可容納大約400病床，又指近日內地批准可用一種新抗癌藥，香港療程要6萬元，內地大約2萬元，相對低嘅藥費，加上國際級硬件、管理，相信高端醫療服務喺大灣區大有可為。
李華華
LiWaWa@AppleDaily.com
長青網 - 一站式長者及護老者生活資訊網站