喜歡運動　曾戰乒壇名將

【蘋果日報】恒生銀行（011）女舵手鄭慧敏（Louisa），落場與乒壇名將對抽兩板波，外界可能見識過，原來一姐運動細胞豐富，亦喜歡越級挑戰，從未跑過10公里或半馬，便直接遠赴夏威夷完成人生第一個全馬；去年4月做完乒乓推廣後仍持續練波，年底已摘取香港乒總計劃的銀章。
熱愛網球同做Gym
乒乓與恒生淵源深厚，她憶述前年中履新不久，已知「恒生乒乓球學院」每年在該行舉行結業禮活動。當同事構思「不如由CEO落場打埋一份」協力推動時，她即首肯；豈料中途得悉對手是世界排名第7的黃鎮廷，「咁壓力就真係有啲嘞，始終代表公司唔可以太差……硬着頭皮試吓啦。」
由零接觸到短訓4個多月至完成使命，她對乒乓這項跨年齡層運動亦體會良多。「乒乓波其實係一樣好好運動，手腳配合，眼嘅配合，可以訓練你反應敏捷，我都贊成大家可以去學吓。」
喜歡運動的Louisa亦熱愛網球、做Gym及跑步，也有一次跑畢全馬經驗。「好辛苦，哈哈哈，可以話畀大家知真係辛苦。」猶幸同跑友人是高手，指點扶持，沿路風光明媚，堅持下終完成賽事。
運動員講挑戰極限，如果乒乓全馬屬超標之作，那她掌舵恒生一年半，幾次業績跑贏預期，股價又曾創新高，會否成為股東對回報指標年年遞升的自然期望，令舵手壓力爆煲？
「我又無咁嘅感覺，如果一個團隊盡咗力，做出嚟嘅成績就係嗰個成績。」年僅54歲的鄭慧敏，職場生涯又有何願景？是在恒生畫上完美句號，抑或重返滙豐更上層樓接受新挑戰？
她說，「呢個問題好易答，等董事局決定我未來方向係點。」若問個人志趣，「現在喺恒生做CEO呢個位置，需要做嘅或者見識嘅仲有好多！」
長青網 - 一站式長者及護老者生活資訊網站